Policia e Kosovës ka arrestuar sot një zyrtar të Administratës Tatimore të Kosovës (ATK) pasi gjatë kontrollit të veturës në bagazhin e saj janë gjetur një sasi e barnave të ndryshme me banderola të Serbisë, për të cilat nuk kishte dokumentacion.

Rasti ka ndodhur rreth orës 09:30 në magjistralen Mitrovicë-Leposaviq, tek ura e Bistricës, ku në një pikë kontroll policia ka ndalur veturën me targa zyrtare, pronë e Administratës Tatimore të Kosovës, të cilën e drejtonte L.P., zyrtar i ATK-së, dhe së bashku me të ishte edhe pasagjeri T.J., po ashtu zyrtar i ATK-së.

Gjatë kontrollit, në bagazhin e veturës janë gjetur barna të ndryshme me banderola të Serbisë, për të cilat nuk posedonin dokumentacione.

Mbi bazën e këtyre veprimeve është krijuar dyshimi, se L.P. ka kryer veprën penale keqpërdorim i pozitës apo autoritetit zyrtar dhe kontrabandë të mallrave.

I dyshuari L.P. pas intervistës në prezencë të avokatit mbrojtës, me vendim të prokurorit është ndaluar për 48 orë, ndërsa T.J., pas intervistës, me urdhër të prokurorit është liruar.