Një person është arrestuar nën dyshimin për lëndim trupor pas një rrahjeje që ndodhi të dielën mbrëma në Shtime.

Policia e Kosovës njofton se më 27 korrik, rreth orës 22:10, ka pranuar një informacion për një përleshje në rrugën “Imer Devetaku” në Shtime.

Pas pranimit të njoftimit, njësitë policore dhe hetuesit kanë dalë në vendin e ngjarjes, ku kanë shoqëruar në stacionin policor të dyshuarin M.A., 27 vjeç.

Personi i lënduar fillimisht ka marrë trajtim mjekësor në Qendrën Emergjente në Shtime, më pas është transferuar në Spitalin Rajonal në Ferizaj dhe, për shkak të natyrës së lëndimeve, është dërguar për trajtim të mëtejshëm në Qendrën Klinike Universitare të Kosovës (QKUK) në Prishtinë.

I dyshuari është intervistuar në prani të avokatit mbrojtës, ndërsa me vendim të prokurorit të shtetit është ndaluar për 48 orë.

Rasti është duke u hetuar nga Sektori i Hetimeve i Stacionit Policor në Shtime.

/Kosovapress/