Policia e Kosovës njofton se janë arrestuar dy persona të dyshuar të cilët lidhen me vrasjen e një gruaje në fshatin Sinidoll të Prishtinës më 29 nëntor (e mërkurë).

Siç njofton policia, operacioni është duke vazhduar me bastisjen e dy lokacioneve në Gjakovë.

“Mbështetur në informacionet e para, dyshohet se bëhet fjalë për vrasje me armë zjarri”, thuhet në njoftimin e policisë.

Njoftimi i plotë:

Me datën 29.11.2023, rreth orës 20:20, kemi pranuar informatën për të shtëna me armë në rrugën "Dalip Alshiqi" në Prishtinë.

Policia si dhe mjekët emergjent, menjëherë kanë dalë në vendin e ngjarjes, ku në një veturë kanë hasë një person pa shenja jete. Vdekjen e viktimës (femër) e ka konstatuar ekipi mjekësor në vendin e ngjarjes.

Mbështetur në informacionet e para, dyshohet se bëhet fjalë për vrasje me armë zjarri.

Policia në koordinim me prokurorinë, ka nisur hetim dhe ndërmarrjen e të gjitha veprimeve hetimore dhe të ekzaminimit, që do të ndihmonin hetimin e ngjarjes si dhe sqarimin e plotë të rastit.

-INFORMACION SHTESË

Pas përfundimit të ekzaminimit të vendit të ngjarjes, janë ndërmarrë veprimeve intensive hetimore të cilat kanë rezultuar në arrestimin e dy personave të dyshuar lidhur me rastin e sipër shënuar.

Njësiti i hetimeve të përgjithshme të Prishtinës në koordinim me Prokurorinë është duke e vazhduar operacionin e bastisjes në dy lokacione në Gjakovë.

https://kosovapress.com/nje-grua-vritet-ne-kryeqytet-policia-nis-hetimet/