Prokuroria Themelore në Prishtinë, njofton se dje (e hënë) në bashkërendim me Policinë e Kosovës, kanë arrestuar pesë persona, të cilët dyshohen se në mënyrë të organizuar si grup kriminal kanë kryer vepra penale si: “Pjesëmarrja ose organizimi i grupit kriminal të organizuar”, nga neni 277 lidhur me veprat penale “Falsifikimi i dokumenteve” dhe “Kontrabandimi me migrantë”, sipas KPRK-së.
Në komunikatën e përbashkët të Prokurorisë dhe Policisë thuhet se gjatë realizimit të operacionit janë arrestuar të dyshuarit me iniciale si në vijim: K. K. viti i lindjes 1965, G. T. viti i lindjes 1969, E. A. viti i lindjes 1970, H. H. viti i lindjes 1978 dhe E. R. viti i lindjes 1992.
Në komunikatë thuhet se Prokuroria në koordinim me Policinë e Kosovës kanë zhvilluar hetime intensive, me qëllim të zbardhjes së veprimtarisë kriminale të disa personave të dyshuar në kryerjen e veprës penale “Falsifikimi i dokumenteve”.
“Më datë 10 tetor në bashkërendim u realizua operacioni policor, ku janë arrestuar pesë persona, të cilët dyshohen se në mënyrë të organizuar si grup kriminal kanë kryer vepra penale si: “Pjesëmarrja ose organizimi i grupit kriminal të organizuar”, nga neni 277 lidhur me veprat penale “Falsifikimi i dokumenteve” dhe “Kontrabandimi me migrantë”, sipas KPRK-së”, thuhet në njoftim.
