Një aksident i rëndë ka ndodhur këtë të premte në tunelin e Kalimashit në Kukës.

Dy vetura janë përplasur me njëra-tjetrën, ndërsa ka ndërruar jetë një pasagjere nga Shkopeti dhe janë plagosur katër të tjerë. Të plagosurit janë transportuar në spirtalin e Kukësit, ndërsa nuk dihet gjendja e tyre.

“Më datë 07.01.2022, në brendësi të tunelit të Kalimashit janë  përplasur dy automjete,  me drejtues shtetasit Gj.M., banues në Shkopet dhe N.Z., banues në Kosovë. Si pasojë e aksidentit ka ndërruar jetë pasagjerja E.S., banuese në Shkopet, si dhe janë plagosur 4 shtetas të tjerë, të cilët janë transportuar në spitalin e Kukësit”, sipas policisë.

Aksidenti i ndodhur këtë mbrëmje ka krijuar trafik të rënduar në hyrje të tunelit, ndërsa zona është përfshirë nga reshjet e dëborës.

Grupi hetimor dhe shërbimet e Njësisë për  Sigurisë Rrugore të autostradës Kalimash- Morinë ndodhen në  vendin e ngjarjes dhe po punojnë për sqarimin e rrethanave dhe shkakut  të aksidentit.