Spekulimet për stolin e Real Madridit janë intensifikuar ndjeshëm kohët e fundit, ku emri që spikat më shumë mes kandidatëve të ofruar është ai i José Mourinhos.

Trajneri aktual i Benficas, përmes agjentit të tij Jorge Mendes, ka shprehur gatishmërinë për një rikthim të mundshëm në "Santiago Bernabéu", duke vënë në lëvizje drejtuesit e klubit madrilen të cilët tashmë janë informuar edhe për klauzolën e tij të lirimit. Përveç portugezit, në zyrat e Valdebebas kanë mbërritur propozime edhe për emra të tjerë të mëdhenj si Pochettino, Nagelsmann, Allegri, Klopp dhe Deschamps, duke krijuar një listë të larmishme opsionesh për pasuesin e mundshëm të Álvaro Arbeloas.

Megjithëse oferta e Mourinhos ka tërhequr vëmendje për shkak të raportit të tij të mirë me Florentino Pérez, bordi i Real Madridit mbetet i fokusuar në mbylljen sa më dinjitoze të sezonit aktual.

E ardhmja e Arbeloas duket gjithnjë e më larg Madridit, veçanërisht pas dështimit në garën për titullin e La Ligës dhe luhatjeve në Champions League.

Vendimi përfundimtar pritet të merret gjatë muajit të ardhshëm, ndërkohë që lojtarët janë alarmuar për imazhin e klubit dhe nevojën për një kthesë në rezultate përpara se të zyrtarizohet ndryshimi në stolin teknik për sezonin e ri.

KosovaPress