Anëtarët e PDK-së në KQZ: Ka tendenca të manipulohet votimi në diasporë
Lajme
Lexohet për: 2 min.
6 ditë më parë
Linku u kopjua
Anëtarët e Komisionit Qendror të Zgjedhjeve (KQZ) nga radhët e Partisë Demokratike të Kosovës (PDK), kanë ngritur shqetësime se ka tendenca të hapura për t’u manipuluar procesi i votimit me postë.
Iliri Gashi, anëtari i KQZ-së nga PDK, gjatë mbledhjes së KQZ-së, ka lëshuar një video ku dëgjohet një adresë ku ftohej mërgata ta vizitonin me qëllim për t’u ndihmuar qytetarëve të votojnë. Sipas Gashit, një veprim i tillë është vepër penale, andaj ai ftoi Prokurorinë e Shtetit për hetimin e rastit.
Edhe anëtari tjetër nga radhët e PDK-së, Arianit Elshani bëri thirrje që veprimet e tilla të ndalen.
Ibrahim Selmanaj, anëtari i KQZ-së nga radhët e AAK-së, tha se kjo çështje është shqetësuese pasi që me këtë po kontaminohet vota për një proces të rëndësishëm zgjedhor.
Por, anëtari i KQZ-së nga Vetëvendosje, Sami Kurteshi, tha se një veprim i tillë nuk përbën aspak shqetësim.
Sipas tij nuk ka pasur raste që Vetëvendosje është gjykuar për manipulim të votës.
Ndërsa, Sami Hamiti nga Lidhja Demokratike e Kosovës tha se në mënyrë institucionale mërgimtarëve u janë ofruar informacionet e nevojshme për mënyrën e votimit.
KQZ sot ka diskutuar edhe mbi ndarjen e këshillave të vendvotimeve, të cilat kanë ngritur pakënaqësi te subjektet politike nga radhët e komuniteteve. Po ashtu, anëtarët e KQZ-së kanë miratuar edhe vendimin për pagesat e stafit të angazhuar në qendrat e votimit, vendvotime dhe qendrat komunale të numërimit.
