Kryetari i Lidhjes Demokratike të Kosovës (LDK), Lumir Abdixhiku, ka vlerësuar tubimin e mbajtur në Pejë, duke thënë se qyteti dha një mesazh të qartë për mbështetjen ndaj vizionit të ri politik të kësaj partie.

Abdixhiku e cilësoi tubimin si madhështor, me pjesëmarrje të madhe të qytetarëve dhe atmosferë të mbushur me energji e besim.

“Një shesh plot njerëz. Plot energji. Plot besim. Një qytet që foli qartë dhe fuqishëm”, ka shkruar ai.

Sipas tij, gjatë takimit me qytetarët u diskutua për nevojën e hapjes së një kapitulli të ri për Kosovën, me fokus te mbështetja për familjet, krijimi i mundësive për të rinjtë, zhvillimi ekonomik, rritja e pagave dhe nxitja e investimeve.

Abdixhiku prezantoi edhe kandidatët e LDK-së nga Peja, duke kërkuar mbështetje për Kujtim Shalën (numri 3), Arben Gashin (28), Besa Gaxherrin (44), Jeton Kelmendin (61), Sadri Berishën (62), Dijellza Shalën (63), Naser Gegën (64), Besë Qerretin (79), Ruzhdi Blakajn (95), Niq Krasniqin (98) dhe Riza Krasniqin (105).

Ai theksoi se Peja historikisht ka qenë prijëse në momente të rëndësishme dhe se edhe këtë herë qytetarët e saj dëshmuan mbështetje për ndryshimin.

“Peja ka ditur gjithmonë të prijë në momente të mëdha. Edhe sot, na dha një mesazh të qartë: shpresa është kthyer. Bashkimi po rritet. Rrugëtimi ynë po merr forcë”, ka deklaruar Abdixhiku.

Zgjedhjet e parakohshme parlamentare mbahen më 7 qershor.