Më shumë se një milion njerëz u mblodhën të dielën në Madrid për meshën kryesore të Papa Leon XIV dhe një procesion që theksoi një nga shprehjet më të njohura të devocionit popullor spanjoll: qilimat me lule.

Turmat brohorisnin “Kjo është rinia e Papës!” ndërsa Papa mbërriti me ‘papamobil’, duke kaluar mes një turme të madhe të mbledhur përgjatë sheshit dhe rrugëve përreth.

Mesha u mbajt për festën katolike Corpus Domini, e cila shoqërohet me procesione fetare ku priftërinjtë mbajnë Eukaristinë, ndërsa rrugët zbukurohen me qilima lulesh — një traditë e fortë në Spanjë dhe vende të tjera katolike.

Papa Leon, në vizitën e tij njëjavore në Spanjë, theksoi rëndësinë e traditës katolike dhe inkurajoi të rinjtë të forcojnë besimin e tyre.

Në vigjiljen e së shtunës, rreth 600,000 të rinj u lutën në heshtje së bashku me të, duke treguar interes të vazhdueshëm të rinisë në një shoqëri gjithnjë e më laike.

Sipas AP, ai u tha të rinjve: “Mos kini frikë të mendoni për thirrje drejt priftërisë, jetës fetare apo shërbimit në Kishë”, përcjell KosovaPress.

Një çift i ri, Irati Valda dhe Javier Hormazal, që do të martohen më 13 qershor, morën edhe bekimin e Papës gjatë vigjiljes.

“Është e pabesueshme të shohësh kaq shumë të rinj së bashku… gjysmë milioni në heshtje, një përvojë që ndodh një herë në jetë”, tha Valda.