Nisi rrugëtimin në PDK, Izmaku i bashkohet Nismës
Lajme
Lexohet për: 2 min.
1 javë më parë
Linku u kopjua
Ish-deputetja e Partisë Demokratike të Kosovës (PDK) Xhevahire Izmaku sot i është bashkuar Nismës Socialdemokrate, duke u rikthyer kështu në skenën politike pas një kohë ndërprerjeje të saj nga aktivitetet politike. Kryetari i Nismës, Fatmir Limaj, mirëpriti aderimin e Izmakut në partinë e tij, derisa përmendi rrugëtimin e vështirë drejt rindërtimit të shtetit. Limaj tha se me Izmakun kanë filluar rrugëtimin politik qe nga 1999, për të kontribuar në ri-ngritjen e shtetit, zhvillimin ekonomik, për çka tha se do të vazhdojnë fuqishëm me konceptin për zhvillimin e vendit tonë.
Ish-deputetja e PDK-së, tashmë anëtare e Nismës Socialdemokrate, Xhevahire Izmaku u zotua se do ta përdorë tërë potencialin e saj profesional e politik për të ngritur dhe fuqizuar këtë parti. “Do ta përdor potencialin profesional e politik për të ngritur dhe fuqizuar Nismën Socialdemokrate”, potencoi Izmaku. Para tri vjetësh, Xhevahire Izmaku ka dhënë dorëheqje nga të gjitha strukturat dhe funksionet e PDK-së, pas rreth dy dekadash sa ishte pjesë e saj. Ndërkaq, NISMA dhe AAK-ja janë në koalicion parazgjedhor. /Z.Zeneli/