Jude Bellingham i Real Madridit u ndëshkua me dy ndeshje pezullim në La Liga të mërkurën nga komiteti disiplinor i federatës spanjolle të futbollit pasi u përjashtua për shkak të protestave ndaj gjyqtarit.

Reprezentuesi anglez u përjashtua gjatë barazimit 1-1 të kampionëve në Osasuna të shtunën nga gjyqtari Jose Munuera Montero.

Bellingham , i cili këmbënguli se kishte shprehur zhgënjimin e tij dhe nuk kishte fyer arbitrin, do të humbasë ndeshjet e ligës kundër Gironas dhe Real Betisit më 23 shkurt dhe 2 mars

Komiteti disiplinor tha se përpjekjet e Madridit për të treguar se Bellingham nuk e kishte fyer zyrtarin ishin "të pamjaftueshme" për të hequr "prezumimin e vërtetësisë së raportit të arbitrit", përcjellë KosovaPress.

Arbitri Munuera Montero është përballur me abuzime dhe kërcënime në internet në ditët që nga përjashtimi i Bellingham, të cilin federata e përshkroi si "të neveritshme".

Real Madridi ka sulmuar arbitrin spanjoll javët e fundit, duke e quajtur atë "të manipuluar" në një letër që i kanë dërguar federatës dhe e kanë publikuar në faqen e tyre të internetit.

“Los Blancos” nuk kanë fituar në tre ndeshjet e fundit të ligës dhe rivalët Barcelona tani kryesojnë tabelën në diferencë golash.