Subjektet kryesore për zgjedhjet parlamentare, të cilat mbahen për herë të parë si të rregullta në Kosovë, kanë dorëzuar tashmë listat e kandidatëve për deputetë, por jo edhe partia në pushtet – Lëvizja Vetëvendosje, për të cilën u tha se ishte duke diskutuar këtë çështje kur Albin Kurtit i erdhi ftesa për gjykatë më 16 dhjetor.

Lidhja Demokratike e Kosovës me Lumir Abdixhikun kandidat për kryeministër, ka publikuar e para si subjekt politik, emrat e kandidatëve që do t’i hyjnë garës zgjedhore për 9 shkurt, në të cilën kjo parti do të hyjë e vetme.

Në dhjetëshen e parë nga lista me gjithsej 110 kandidatë, janë kryetari Lumir Abdixhiku, Kujtim Shala, Doarsa Kica-Xhelili, Lutfi Haziri, Gazmend Muhaxheri, Hykmete Bajrami, Imri Ahmeti, Sokol Haliti, Jehona Lushaku-Sadriu dhe Anton Quni.

Koalicioni AAK - Nisma Socialdemokrate - Konservatorët - E30 dhe Ideal, ka thënë se lista e kësaj partie prej 110 kandidatëve janë garancia më e fortë e përfaqësimit të zërit të qytetarit në Kuvendin e Kosovës.

Në dhjetëshen e parë të listës janë kandidati për kryeministër dhe bartës i listës, Ramush Haradinaj, Fatmir Limaj, Time Kadrijaj, Ardian Gjini, Nuredin Lushtaku, Albana Bytyqi, Pal Lekaj, Bekë Berisha, Xhevahire Izmaku e Besnik Tahiri. Në listë është përfshirë edhe Isni Kilaj.

Partia Demokratike e Kosovës ka publikuar listën e 110 kandidatëve për deputetë. Kandidat i kësaj partie për kryeministër në zgjedhjet e 9 shkurtit është Bedri Hamza.

Në dhjetëshen e parë të listës janë Bedri Hamza, kryetari Memli Krasniqi, Vlora Çitaku, Enver Hoxhaj, Uran Ismaili, Eliza Hoxha, Rrahman Rama, Bernard Nikaj, Sala Jashari dhe Abelard Tahiri. Pasojnë Jakup Nura, Gaznimete Musliu, Blerta Deliu-Kodra, Xhavit Haliti, Kujtim Gashi, Ferat Shala, Elmi Reçica, Ariana Musliu-Shoshi, Fadil Demaku e Altin Krasniqi.

Kryetari i Partisë Demokratike të Kosovës, Memli Krasniqi ka thënë se lista e PDK-së nuk paraqet vetëm emra,  por një ekip fitues për një Kosovë më të mirë.

“Mbi 50% e listës së kandidatëve tanë janë pjesë e garës për herë të parë, duke sjellë energji dhe ide të reja në misionin tonë. Dua të shpreh falënderimet e mia më të sinqerta për të gjithë ata që janë pjesë e kësaj liste dhe për ata që kanë shprehur gatishmërinë për të kontribuar, qoftë edhe në mënyra të tjera të rëndësishme”, tha Krasniqi.

Ai theksoi se suksesi i PDK-së në zgjedhjet e 9 shkurtit është i garantuar me këtë listë të prirë nga kandidati për kryeministër, Bedri Hamza.

Ndërsa nga Vetëvendosje ende nuk kanë prezantuar listën e kandidatëve. Zëdhënësi i Qeverisë së Kosovës Përparim Kryeziu njoftoi më herët se Prokurori i Shtetit ka ftuar kandidatin për kryeministër Albin Kurti për paraqitje në Prokurorinë Speciale më 16 dhjetor.

Ai tha se Kurti ndodhej në mbledhjen e Kryesisë së Vetëvendosjes për të përmbyllur listën e kandidatëve për deputetë nga koalicioni LVV, Guxo dhe Alternativa, kur u njoftua për ardhjen e ftesës.

Sipas tij, në zgjedhjet e kaluara kishte një vendim gjyqësor i cili ia kishte pamundësuar kandidimin në garën zgjedhore të 14 shkurtit 2021, kurse tash përmes kësaj ftese po tentohet ndikimi në rezultatin e zgjedhjeve të 2025.

“Qëllimi mbetet i njëjtë. Metoda ka ndryshuar. Kjo është ndërhyrje e sistemit të drejtësisë në proces zgjedhor”, ka shkruar Kryeziu në Facebook.

KQZ ka zgjatur sot afatin deri në mesnatë për dorëzimin e listës së kandidatëve për zgjedhjet parlamentare të 9 shkurtit 2025, pasi më herët deri në 16:00 sipas afatit, një gjë të tillë e kishin bërë vetëm dhjetë subjekte politike.

Sipas KQZ-së, për shtyrje kanë marrë në konsideratë se ky proces për herë të parë realizohet përmes platformës online, dhe disa nga subjektet politike kanë pasur vështirësi në përdorimin e saj.

• 

• 

• 

•