Zëvendëskryeministri Besnik Bislimi, në tryezën e organizuar sot nga Këshilli i Investitorëve Evropian “Presidenca Çeke e BE-së 2022 dhe Ballkani Perëndimor”, ka shfaqur pritjet e tij për heqjen sa më të shpejtë të regjimit të vizave për qytetarët e Kosovës.

Ai me këtë rast ka përkujtuar se heqja e vizave është vonuar pavarësisht se Kosova ka përmbushur kushtet.

“Gjatë diskutimit, potencova pritjet e mëdha nga Presidenca Çeke, ku thërrasim që momentumin aktual pozitiv të vazhdojë me vendimin e vonuar, tashmë më shumë se katër vjet për liberalizimin e vizave për qytetarët e Kosovës. Kosova ka vazhduar që të tregohet e përkushtuar në reformat e sundimit të ligjit, luftimit të korrupsionit, krimit të organizuar dhe migrimit. Në luftimin e korrupsionit është ndërruar tërësisht imazhi i Kosovës jo vetëm në rajon por edhe më gjerë. Shembuj janë ngritja në 17 vende në “Transparency International”, raporti i Parlamentit Evropian i cili mirëpriti intensifikimin e përpjekjeve për të luftuar korrupsionin dhe krimin e organizuar, si dhe sundimi i ligjit parë nga World Justice Index ku jemi shpallur të parët në rajon”, ka shkruar Bislimi në Facebook.

Ai ka theksuar se në fushën e migrimit, Kosova ka ndërtuar kapacitetet e nevojshme për menaxhimin e migrimit, ku ka nënshkruar 24 marrëveshje për ripranim me 22 vende anëtare të BE-së, duke bërë kështu që vendi ynë të ketë numrin më të vogël në rajon të azilkërkuesve pas Malit të Zi.

“Sa i përket aplikimit për anëtarësim në BE, theksova se vitin tjetër bëhen 20 vjet nga Samiti i Selanikut dhe Kosova mbetet vendi i vetëm në Ballkanin Perëndimor i cili nuk ka aplikuar ende për anëtarësim. Perspektiva evropiane duhet të përkthehet në perspektivë për anëtarësim të plotë në BE, e aplikimi ynë është përpjekje për të konkretizuar këtë të fundit”, ka përfunduar Bislimi.