Toni Kroos kritikon ashpër Gjermaninë: Nuk kemi asnjë lojtar të klasit botëror
Sport
Lexohet për: 2 min.
Dëgjoje me zë...
Toni Kroos kritikon ashpër Gjermaninë: Nuk kemi asnjë lojtar të klasit botëror
Legjenda e futbollit gjerman, Toni Kroos, ka kritikuar ashpër kombëtaren e Gjermanisë pas eliminimit nga Paraguai në Botëror. Duke folur në podcastin e tij, ish-mesfushori i Real Madridit tha se problemi kryesor i ekipit është mungesa e lojtarëve që bëjnë diferencën në momentet vendimtare.
Kroos: “Aktualisht nuk kemi asnjë lojtar të klasit botëror. Kemi futbollistë me potencial për t'u bërë të tillë, por kjo nuk do të thotë se janë tashmë të klasit botëror.”
Ai shtoi se lojtarët më të mirë janë ata që po vendosin ndeshjet e Botërorit, ndërsa Gjermanisë i mungon një figurë e tillë.
Kroos: “Lojtarët e klasit botëror po vendosin ndeshjet e këtij Botërori dhe po kryesojnë listën e golashënuesve. Ne nuk kemi asnjë të tillë dhe duhet ta pranojmë këtë.”
Ish-kampioni i botës me Gjermaninë në vitin 2014 theksoi gjithashtu se skuadra aktuale nuk ka më aftësinë për të ngritur nivelin në ndeshjet e mëdha.
Kroos:
“Kur kishim turne të suksesshëm, gjithmonë ndihesha se mund të kalonim në një nivel më të lartë. Ky ekip nuk është më i aftë ta bëjë këtë. Thjesht mendojmë se jemi më të mirë se Paraguai dhe se do të fitojmë disi.”
Kroos u dallua gjatë gjithë karrierës për inteligjencën taktike, pasimet e sakta, qetësinë me topin dhe lidershipin në fushë. Pikërisht për shkak të suksesit dhe përvojës së tij në nivelet më të larta të futbollit, kritikat e tij ndaj kombëtares gjermane kanë ngjallur debat të madh në opinionin sportiv.
KosovaPress
