Rusia nisi një valë sulmesh me dronë dhe raketa në të gjithë Ukrainën të mërkurën në mbrëmje, duke vrarë të paktën 13 persona, thanë zyrtarët ukrainas.

Një djalë 12-vjeçar ishte midis pesë viktimave në kryeqytet, sipas Shërbimit Shtetëror të Emergjencave të Ukrainës.

Dy persona u vranë në qytetin juglindor të Dnipros, ndërsa sulmet me raketa dhe dronë në qytetin portual jugor të Odesës lanë të vdekur gjashtë persona, thanë zyrtarët, shkruan BBC, transmeton KosovaPress.

Matanë kufirit, dy fëmijë, të moshës pesë dhe 14 vjeç, u vranë në një sulm me dron ukrainas në rajonin jugor të Krasnodar Krai të Rusisë, tha guvernatori i saj Veniamin Kondratyev në Telegram.

Sulmet ishin sulmet e fundit pas një armëpushimi të shkurtër që përkoi me festimet e Pashkëve Ortodokse në fundjavë, gjatë të cilit të dyja palët akuzuan njëra-tjetrën për qindra shkelje .

Kryebashkiaku i Kievit, Vitali Klitschko, shkroi në Telegram se, përveç vdekjeve në kryeqytet, ekipet e shpëtimit kishin nxjerrë një nënë dhe një fëmijë nga rrënojat e një ndërtese banimi 16-katëshe që u shemb në lagjen qendrore Podilsky të Kievit.

Në veri të kryeqytetit, katër punonjës të urgjencës mjekësore ishin midis të plagosurve si pasojë e bombardimeve të përsëritura.

Në një sulm në qytetin qendror të Dnipros, dy persona u vranë dhe të paktën 10 të tjerë u plagosën, shkroi në Telegram Oleksandr Ganzha, kreu i administratës rajonale. Fotot e postuara në internet treguan ndërtesa në flakë në qytet.