Indeksi i tërësishëm i harmonizuar i çmimeve të konsumit (IHÇK) në Kosovë ka shënuar rritje mesatare prej 6,0 për qind në muajin shkurt 2026, krahasuar me muajin shkurt të vitit 2025, ndërsa inflacioni mujor ishte 0,6 për qind krahasuar me janarin 2026, raporton KosovaPress.

Sipas Agjencisë së Statistikave të Kosovës, rritja vjetore e çmimeve është ndikuar kryesisht nga shtrenjtimi i disa grupeve të mallrave dhe shërbimeve, përfshirë shërbimet në lidhje me pajisjet personale të transportit (42,5%), biletat e fluturimeve (39,0%), si dhe furnizimi me ujë dhe shërbime të tjera që lidhen me vendbanimin (33,4%).

Rritje të dukshme janë regjistruar edhe te lëndët djegëse të ngurta si drutë dhe peleti (16,8%), pemët (16,4%), mirëmbajtja dhe riparimi i pajisjeve të transportit (15,1%), si dhe mishi (14,7%). Po ashtu janë shtrenjtuar edhe pushimet e organizuara (13,2%), shërbimet ambulantore (9,6%), shërbimet hoteliere (9,5%) dhe kafeja, çaji dhe kakao (9,3%).

Rritje janë regjistruar edhe te produkte të tjera ushqimore dhe shërbime, përfshirë peshkun, perimet, produktet e qumështit, bukën dhe drithërat, pijet alkoolike, si dhe mallrat për mirëmbajtjen e ekonomisë shtëpiake.

“Shtrenjtime pësuan edhe për peshq (8,0 %); sheqer, reçel, mjaltë, çokollatë dhe ëmbëlsira  (7,4 %); vegla dhe pajisje për shtëpi dhe kopsht (6,7 %); kujdes personal (6,6 %); perime  (6,4 %); pije alkoolike (6,4 %); mallra dhe shërbime për mirëmbajtjen e zakonshme të ekonomisë shtëpiake (6,1 %),; qumësht, djathë dhe vezë (5,6 %); mirëmbajtje dhe rregullim të vendbanimit (5,5 %);  prodhime ushqimore (5,4 %); gjëra personale (5,2 %); bukë dhe drithëra (5,2 %); duhan  (4,2 %); produkte mjekësore, aparaturë dhe pajisje (3,9 %); mobile dhe orendi, qilima dhe mbulesa të tjera dyshemeje (3,9 %); veshje (3,3 %); vajra dhe yndyra (3,1 %); ujë mineral, pije joalkoolike, lëngje nga pemët dhe perimet (2,7 %); me një ndikim të përbashkët të këtyre nëngrupeve prej 6,4 për qind në IHÇK”, thuhet në njoftimin e ASK-së.

Në të njëjtën periudhë, rënie e çmimeve është vërejtur vetëm te karburantet dhe lubrifikantët për pajisjet e transportit personal, të cilat kanë shënuar ulje prej 7,6 për qind në baza vjetore.

Sa i përket inflacionit mujor, në shkurt 2026 çmimet u rritën mesatarisht 0,6 për qind krahasuar me janarin 2026. Kjo rritje u ndikua kryesisht nga shtrenjtimi i shërbimeve për pajisjet personale të transportit (24,4%), perimeve (5,8%), pemëve (4,0%) dhe pajisjeve audio-vizuele dhe të përpunimit të informatave (3,8%).

/Kosovapress/