Autoritetet kolumbiane nuk gjetën asnjë të mbijetuar pasi një aeroplan me 13 pasagjerë dhe dy anëtarë të ekuipazhit u rrëzua të mërkurën, autoriteti i Aeronautikës Civile të vendit, shkruan CNN, transmeton KosovaPress.

Kongresmeni kolumbian Diogenes Quintero ishte mes personave në bord, sipas partisë që e kishte nominuar atë për Dhomën e Përfaqësuesve.

Ekipi i komunikimit i Quinteros tha se humbi kontaktin me të dhe me asistentin e tij pasi avioni u zhduk. Vendndodhja e fundit e regjistruar në telefonat e tyre ishte aeroporti Camilo Daza në Cúcuta, “para ngritjes”, bëri të ditur ekipi i tij.

Quintero kishte qenë anëtar i legjislaturës kombëtare që nga viti 2022 dhe përfaqësonte “zonat zgjedhore speciale të paqes”, një nga 16 vendet në Kongres të krijuara për të përfaqësuar viktimat e dhunës, si pjesë e marrëveshjeve të paqes të vitit 2016 me militantët e Forcave të Armatosura Revolucionare të Kolumbisë (FARC).

“Diogenes Quintero ishte një udhëheqës i përkushtuar ndaj rajonit të tij, me një thirrje të vendosur për shërbim dhe një ndjenjë të thellë përgjegjësie publike”, tha Partia U e Kolumbisë.

Aeroplani, i operuar nga linja ajrore shtetërore Satena, humbi kontaktin me kontrollin e trafikut ajror menjëherë pas ngritjes, kishte deklaruar më herët ministrja e Transportit, Maria Fernanda Rojas.

Ai po fluturonte nga Cúcuta drejt Ocanës, në departamentin verilindor të Norte de Santander. Satena raportoi se avioni u ngrit në orën 11:42 sipas kohës lokale dhe ishte planifikuar të ulej rreth orës 12:05, por kontakti i fundit me kontrollin e trafikut ajror ishte në orën 11:54.

Faqja e gjurmimit të fluturimeve FlightAware tregon se sinjali i aeroplanit u zhduk nëntë minuta pasi u ngrit nga aeroporti Camilo Daza.

Autoritetet e gjetën aeroplanin e rrëzuar në një zonë rurale të La Playa de Belén pas një kërkimi që përfshiu disa avionë, thanë zyrtarët. Zyra e guvernatorit të Norte de Santander shprehu ngushëllime për familjet e viktimave.

“Na vjen thellësisht keq për tragjedinë që ndodhi pas aksidentit të avionit të konfirmuar në orët e fundit në zonën rurale të La Playa de Belén. Shprehim solidaritetin dhe ngushëllimet tona të sinqerta për familjet, miqtë dhe të dashurit e viktimave”, thuhet në deklaratë.