Presidentja e Republikës së Kosovës, Vjosa Osmani, ka reaguar pas kërkesës së Kryeprokurorja e Zyrës së Prokurorit të Specializuar, Kimberly West ka kërkuar 45 vjet burgim për Hashim Thaçin, Kadri Veselin, Rexhep Selimin e Jakup Krasniqin. 

Ajo ka shkruar në Facebook se çdo përpjekje për të barazuar luftën çlirimtare të UÇK-së me krimet e agresorit serb minon besimin në drejtësi dhe dëmton rëndë paqen afatgjatë.

Osmani ka shkruan në Facebook se pavarësia e Kosovës ishte vullnet i qartë i popullit dhe rezultat i një sakrifice shekullore, për të cilën dhanë jetën mijëra dëshmorë dhe civilë të pafajshëm.

Osmani ka theksuar se për lirinë e Kosovës luftoi me heroizëm dhe luftë të pastër Ushtria Çlirimtare e Kosovës, duke shtuar se gjenocidi, krimet kundër njerëzimit dhe krimet e luftës janë krime që Serbia i ka kryer ndaj popullit të Kosovës ndër shekuj.

Sipas saj, gjatë luftës së fundit në Kosovë, Serbia kishte për qëllim shfarosjen e popullit shqiptar, çka u manifestua përmes vrasjes dhe masakrimit të mijëra fëmijëve, grave, burrave dhe të moshuarve, dhunimit të mijëra grave dhe burrave, shkatërrimit të qindra mijëra shtëpive, dëbimit të mbi 80 për qind të qytetarëve nga shtëpitë e tyre, spastrimit etnik, zhdukjes me dhunë të mijëra personave dhe krimeve të tjera të rënda.

Ajo ka shtuar se Kosova dhe qytetarët e saj kërkojnë drejtësi, duke nënvizuar se e vërteta për luftën e UÇK-së nuk mund të ndryshohet përmes përpjekjeve për ta rishkruar historinë apo për ta zhvleftësuar betejën e popullit të Kosovës për liri.

/Kosovapress/