Osmani: Kosova nuk mund të ecë përpara pa aleatë
Presidentja Vjosa Osmani ka thënë se Kosova nuk mund të ecë përpara vet pa ndihmën e aleatëve. Sipas saj, çështja e dinarit nuk është dashur të shkaktonte përplasje me miqtë ndërkombëtarë.
E para e shtetit në një deklaratë për media pas konferencës rajonale “Parlamentarizmi dhe Rezoluta 1325: Perspektivat nga Ballkani Perëndimor”, foli edhe për çështjen e dialogut dhe zgjedhjeve në katër komunat veriore.
Sipas saj, rregullorja e BQK-së, ku ndalohet përdorimi i dinarit në Kosovë nuk është dashur të bëhet çështje fare.
Krahas kësaj, Osmani bëri të ditur se shumë shpejtë KQZ-ja do të miratojë planin operacional për largimin e kryetarëve nga komunat në veri që pastaj do të prodhonte zgjedhjet e reja atje.
Sipas saj në këtë çështje duhet të ecet përpara, pasi largimi i masave është i ndërlidhur me zgjedhjet e reja në veri.
Sa i përket dialogut, Osmani tha se të njëjtin e ka dëmtuar mungesa e balancimit nga ndërmjetësuesi.
“Punën e dialogut më së shumti e ka dëmtuar mungesa e balancimit, njëra palë, në këtë rast Kosova është nën masa, ndërsa Serbia përkundër që ka kryer agresion nuk ka pësuar asnjë masë të vetme. Kjo jo vetëm që e dëmton dialogun, por të njëjtën kohë edhe inkurajon Serbinë që të vazhdojë me veprime destabilizuese në rajonin tonë”, theksoi Osmani.
Ajo foli edhe për zgjedhjet në BE.
