Kryetarja e Kuvendit, Albulena Haxhiu tha se legjislatura e dhjetë shpërndahet automatikisht dhe se zgjedhjet do të shpallen brenda afatit kushtetues.

Kuvendi i Kosovës ka dështuar të zgjedhë presidentin e vendit. Pas përfundimit të afatit kushtetues, Kosova do të shkojë në zgjedhje të reja, më së largu deri më 7 qershor.

Në seancën e jashtëzakonshme për presidentin nuk morën pjesë partitë e opozitës, derisa për ta zgjedhur presidentin duhet të ishin votat e dy të tretave të deputetëve në kutitë e votimit në dy raundet e para.

Në vazhdimin e seancës para mesnatës nuk u zhvillua fare procesi i votimit për dy kandidatet për presidente, Feride Rushiti dhe Hatixhe Hoxha.

Kryetarja e Kuvendit, Albulena Haxhiu tha se legjislatura e dhjetë shpërndahet automatikisht dhe se zgjedhjet do të shpallen brenda afatit kushtetues.

“Kjo seancë shënon fundin e këtij procesi dhe fundin e kësaj legjislature fatkeqësisht. Sipas aktgjykimit të gjykatës kushtetuese Kuvendi konsiderohet i shpërndarë dhe zgjedhjet do të shpallen brenda afatit kushtetues”, tha kryeparlamentarja Haxhiu.

Ndërkaq, deri pak para përfundimit të afatit kushtetues mbajti fjalim kryeministri Albin Kurti. /KosovaPress/

/Kosovapress/