Ish-futbollisti dhe trajneri Ardian Kozniku ka vlerësuar lart paraqitjet e kombëtares shqiptare në evropianin që po mbahet në Gjermani.

Shqipëria në dy ndeshjet e para ka nxjerrë një barazim me Kroacinë dhe ka pësuar nga Italia, teksa tash e pret përballja vendimtare ndaj liderit të grupit – Spanjës.

Kozniku thotë se përvoja e fituar ka ndikuar pozitivisht te kuqezinjtë në përballjet me skuadra më të forta.

Trajneri i njohur beson se të përzgjedhurit e kombëtares shqiptare do të jenë në gjendje ta befasojnë Spanjën, duke siguruar kualifikimin historik.

Sipas Koznikut, meritat për kombëtaren shqiptare i atribuohen trajnerit brazilian Silvinjo, por edhe angazhimit maksimal të lojtarëve kuqezinj.

Shqipëria renditet e treta në grupin B me një pikë, po aq sa edhe Kroacia në të katërtin. Në rast fitoreje ndaj Spanjës, Shqipëria mund të sigurojë fazën e radhës historike, por me kusht që Italia të humbasë ose të barazojë përballë Kroacisë.