Është shënuar Dita Botërore pa Duhan nën moton “Zbulimi i joshjes – luftimi i varësisë nga nikotina dhe duhani”, nga Ministria e Shëndetësisë konkretisht Instituti Kombëtar i Shëndetësisë Publike të Kosovës, në bashkëpunim me Ministrinë e Arsimit dhe Shkencës si dhe me drejtoritë komunle të arsimit.

Ky aktivitet ndërgjegjësues është mbajtur gjatë ditës së sotme.

Sipas njoftimit të Ministrisë së Shëndetësisë në rrjetin social në Facebook, ky aktivitet kishte për qëllim ngritjen e vetëdijes tek të rinjtë dhe qytetarët për pasojat e dëmshme të përdorimit të duhanit dhe produkteve të nikotinës, transmeton KosovaPress.

“Përmes këtij organizimi u synua sensibilizimi i komunitetit mbi ndikimin negativ që këto produkte kanë në shëndet, sidomos tek gjeneratat e reja, si dhe inkurajimi i tyre për të zgjedhur mënyra më të shëndetshme jetese”, thuhet në njoftim.

Ndërkaq kjo ministri njoftoi se aktiviteti është pasuruar me ndarjen e çmimeve për nxënësit pjesëmarrës në garën me punime me mesazhe kundër duhan pirjes dhe me ekspozimin e tyre.

Këto punime përcollën mesazhe vetëdijësuese dhe kreative kundër përdorimit të duhanit dhe nikotinës.

Në fund në Ministria përcolli mesazhin se çdo vendim i sotëm për shëndetin është një investim për të ardhmen e brezave që vijnë.

/Kosovapress/