Në muajt pas lindjes së fëmijës së saj të tretë, shëndeti mendor i Lindsay Clancy u përkeqësua ndjeshëm. Ajo ishte në gjendje të manisë, nuk mund të flinte dhe kishte mendime për të dëmtuar veten. Për këtë arsye, kërkoi ndihmë nga ekspertë të çrregullimeve të humorit pas lindjes, mori disa medikamente psikiatrike dhe, kur asgjë nuk funksionoi, u shtrua në një spital psikiatrik.

Nëntëmbëdhjetë ditë pasi u lirua nga spitali, ajo mbyti me duar tre fëmijët e saj në shtëpinë e familjes në Massachusetts, SHBA.

Një juri pritet të dëgjojë deklaratat hyrëse të hënën në gjyqin ndaj Clancy-t për vrasje, ku pritet të paraqiten dy qëndrime të kundërta lidhur me përgjegjësinë dhe gjendjen e saj mendore.

Prokurorët pritet të argumentojnë se Clancy, ish-infermiere e lindjes në Massachusetts General Hospital, i kishte planifikuar me kujdes vrasjet dhe mban përgjegjësi të plotë për vdekjen e fëmijëve.

Avokati i saj, Kevin Reddington, do të argumentojë se në kohën e vrasjeve ajo vuante nga psikoza pas lindjes, një çrregullim i rrallë mendor i lidhur me stresin, mungesën e gjumit dhe ndryshimet hormonale që pasojnë lindjen.

Gjyqi pritet të zgjasë disa javë, raporton AP, përcjell KosovaPress.

/Kosovapress/