Kryetari i Komunës së Istogut, Ilir Ferati së bashku me nënkryetarin për komunitete Valmir Rama dhe me bashkëpunëtorë sot ka pritur në takim Shefin e zyrës së Këshillit të Evropës, zyra në Prishtinë, Tankut Soykan, përfaqësuesit e programit ROMACTED II, Sakibe Jashari, Besim Shkololli dhe Dhurata Sefa.

Gjatë këtij takimi u diskutua për të drejtat e njeriut me theks të veçantë të komuniteteve në Komunën e Istogut si dhe për projektet; Kanalizimi në Dubravë” dhe “Këndi i lojërave për fëmijë në Shfmu “Martin Camaj” në Gurrakoc”. Projekte këto të cilat u përuruan sot dhe u realizuan në bashkëpunim mes komunës dhe Programit ROMACTED II.

Kryetari Ilir Ferati tha se është mirënjohës që Komuna e Istogut ka qenë pjesë e këtij programi. “Falënderoj Këshillin e Evropës, zyrën në Prishtinë për përfshirjen e komunës sonë në Programin ROMACTED II. Shpresoj që projekte të tilla do të inaugurojmë edhe në të ardhmen dhe bashkëpunimi ynë të vazhdoj edhe me projekte të tjera”, është shprehur kryetari Ferati.

Shefi i zyrës së Këshillit të Evropës, zyra në Prishtinë, Tankut Soykan në emër të Këshillit të Evropës ka falënderuar Komunën e Istogut për kontributin dhe bashkëpunimin e shkëlqyer në realizimin e projekteve dhe tha se vlerëson faktin që projektet janë realizuar pas iniciativës së komunitetit në këto vendbanime.

“Ne do të vazhdojmë të përkrahim të drejtat e njeriut dhe të komuniteteve në Komunën e Istogut. Dua të theksoj se dyert tona janë të hapura gjithmonë për ju si institucion dhe për komunitetet që jetojnë në komunën tuaj” është shprehur Soykan.