Një incident me të shtëna me armë zjarri në ajër në lagjen nr. 1 të Sarandës ka shkaktuar panik mes banorëve mbrëmjen e 12 marsit.

Ngjarja ka ndodhur pas një konflikti mes disa të rinjve ,ku identifikohen dhe ndalohen katër persona, ndërsa dy të tjerë shpallen në kërkim.

Falë reagimit të menjëhershëm dhe veprimeve intensive hetimore nga Seksioni për Hetimin e Krimeve në Komisariatin e Policisë Sarandë bënë të mundur zbardhjen e shpejtë të ngjarjesë.

“ Nga veprimet hetimore dyshohet se më datë 12.03.2026, rreth orës 22:30, në rrugën “Panorama”, shtetasi J. L. dhe një shtetas i mitur, për motive të dobëta dhe pas konflikteve të mëparshme me disa të rinj, kanë qëlluar me armë zjarri në ajër me qëllim kanosjen e tyre.”-thuhet në njoftimin e Policisë.

Si rezultat i ndërhyrjes së shpejtë të policisë, mbrëmjen e 13 marsit u bë e mundur ndalimi i katër personave: A. Z., G. A., A. B. dhe D. Z., të moshës 18 vjeç dhe banues në Sarandë. Sipas hetimeve, ata dyshohet se ishin në dijeni të ngjarjes, por nuk e kishin kallëzuar atë, duke penguar zbardhjen e situatës.

Gjatë kontrollit në vendin e ngjarjes, policia sekuestroi 5 gëzhoja, disa aparate celularë dhe një automjet si prova materiale.

Ndërkohë, shtetasi J. L. 19 vjeç dhe një shtetas i mitur janë shpallur në kërkim, dhe vijon puna për kapjen e tyre dhe për zbardhjen e plotë të rrethanave të ngjarjes.

Materialet procedurale iu referuan Prokurorisë Sarandë për veprat penale: “Kanosja”, “Prodhimi dhe mbajtja pa leje e armëve luftarake dhe municionit”, “Prishja e qetësisë publike” dhe “Moskallëzimi i krimit”.

/Kosovapress/