Katari nuk do të ndërmjetësojë më në bisedimet e armëpushimit në Gaza derisa Hamasi dhe Izraeli "të tregojnë një vullnet të sinqertë për t'u kthyer në tryezën e bisedimeve", tha një zyrtar i njohur me çështjen.

Vendi i Gjirit Persik arriti në përfundimin se zyra politike e Hamasit në Doha "nuk i shërben më qëllimit të saj", shtoi zyrtari.

Ky veprim shënon pengesën më të madhe në përpjekjet për të arritur një armëpushim që kur Hamasi nisi luftën në Gaza me një sulm ndaj Izraelit më 7 tetor të vitit të kaluar.

"Katari ka thënë që nga fillimi i konfliktit se ata mund të ndërmjetësojnë vetëm kur të dyja palët tregojnë një interes të vërtetë për të gjetur një zgjidhje," tha zyrtari për mediat britanike.

Ai shtoi se Katari kishte informuar Hamasin, Izraelin dhe administratën amerikane për vendimin e tij.

Katari, së bashku me SHBA-në dhe Egjiptin, luajtën një rol të rëndësishëm në negociatat e deritanishme të pasuksesshme për një armëpushim në luftën njëvjeçare në Gaza.

Raundi i fundit i bisedimeve në mes të tetorit dështoi për të arritur një marrëveshje pasi Hamasi hodhi poshtë një propozim armëpushimi afatshkurtër.

Në raundin e mëparshëm të bisedimeve të armëpushimit, mosmarrëveshjet mbi kërkesat e reja të bëra nga Izraeli për një prani të ardhshme ushtarake në Gaza penguan një marrëveshje, edhe pasi Hamasi pranoi një version të propozimit të armëpushimit të paraqitur nga Biden në maj.

Nuk është e qartë se sa zyrtarë të Hamasit jetojnë në Doha, por ata përfshijnë disa liderë që mund të zëvendësojnë liderin Yahya Sinwar, i cili u vra nga forcat izraelite në Gaza muajin e kaluar.