Merr fund beteja e ashpër ligjore mes Johnny Depp dhe Amber Heard. Aktori i njohur ka fituar gjyqin ndaj ish-bashkëshortes së tij, të cilën e kishte paditur për shpifje.

Sipas jurisë, shkrimi i Heard, referuar marrëdhënies së saj me Depp, ishte i rremë dhe përcillte "një implikim shpifës" për njerëzit e tjerë përveç aktorit. Depp, i njohur më së shumti për rolin e tij në filmin “Piratet e Karaibeve”, është dëmshpërblyer me 15 milionë dollarë.

Pas vendimit, Depp u shpreh se juria i kishte kthyer sërish jetën

"Akuza të rreme, shumë të rënda dhe kriminale u ngritën ndaj meje përmes mediave, të cilat shkaktuan një breshëri të pafund përmbajtjesh urrejtjeje. Ajo tashmë kishte udhëtuar nëpër botë dy herë brenda një nanosekondi dhe kishte një ndikim shkatërrues në jetën dhe karrierën time. Dhe gjashtë vjet më vonë, juria ma ktheu jetën time. Jam vërtet i përulur”, tha aktori.

Ish-bashkëshortja e tij, Heard tha se ndihej e zhgënjyer dhe se kishte mbetur pa fjalë.

“Zhgënjimi që ndjej sot është përtej fjalëve. Më dhemb zemra që mali i provave ende nuk ishte i mjaftueshëm për t'i bërë ballë fuqisë dhe ndikimit joproporcional të ish-bashkëshortit tim. Unë jam edhe më e zhgënjyer në atë që ky vendim do të thotë për gratë e tjera. Është një kthim prapa. Ajo e kthen orën në një kohë kur një grua që flet mund të turpërohej dhe poshtërohej publikisht. Ajo e kthen prapa idenë se dhuna ndaj grave duhet marrë seriozisht. Unë besoj se avokatët e Johnny-t ia dolën mbanë që juria të anashkalonte çështjen kyçe të Lirisë së Fjalës dhe të shpërfillte provat që ishin aq bindëse sa fituam në MB. Më vjen keq që e humba këtë çështje. Por jam akoma më e trishtuar që duket se kam humbur të drejtën që mendoja se e kisha si amerikane të flas lirshëm dhe hapur”, tha aktorja.

Depp, 58 vjeç, kishte paditur ish-gruan e tij për shpifje dhe kërkonte 50 milionë dollarë, referuar një artikulli të Washington Post të viti 2018, ku ajo akuzoi aktorin se e kishte dhunuar.

Heard, 36 vjeç, paditi për ish-bashkëshortin e saj dhe kërkonte 100 milionë dollarë, duke thënë se e “ndoti” atë duke e quajtur gënjeshtare.

Juria e liroi Depp nga dy akuzat e ngritura nga Heard, por aktorja ka fituar një pjesë të çështjes së saj për shpifje kundër Johnny Depp, referuar disa artikujve në Daily Mail, në të cilat ish-avokati i Johnny Depp i përshkroi pretendimet e saj për abuzim në familje si një mashtrim. Heard është dëmshpërblyer me 2 mln dollarë.