Instituti Hidrometeorologjik i Kosovës ka njoftuar se gjatë vikendit pritet të mbajë mot kryesisht i qëndrueshëm dhe me diell në gjithë vendin.

Sipas një komunikate të institutit, të shtunën, vendi do të jetë nën ndikimin e një fushe të qëndrueshme të presionit të lartë atmosferik, duke sjellë kushte stabile dhe pa zhvillime të theksuara të vranësirave. Temperaturat minimale do të lëvizin ndërmjet 3 deri në 5 gradë Celsius, ndërsa ato maksimale pritet të arrijnë nga 18 deri në 21 gradë Celsius. Era do të fryjë nga juglindja me intensitet të ulët deri mesatar.

Ndërkaq, të dielën parashihet mot i ngjashëm, por me një rritje të lehtë të temperaturave maksimale, të cilat mund të arrijnë deri në 22 gradë Celsius. Vranësirat do të jenë më të dukshme kryesisht në zonat malore gjatë orëve të pasdites. Temperaturat minimale do të mbeten në intervalin 3–5 gradë Celsius, ndërsa era do të jetë e lehtë dhe me drejtim të ndryshueshëm.

Sipas IHMK-së, këto kushte janë të favorshme për zhvillimin e kulturave bujqësore pranverore, megjithatë temperaturat e ulëta minimale mund të paraqesin rrezik të lehtë për disa kultura të ndjeshme në fazat e hershme të zhvillimit.

/Kosovapress/