Kryetarja e Kuvendit të Kosovës, Albulena Haxhiu, ka reaguar lidhur me debatet për ekspozitën “Masakrat në Kosovë 1998–1999”, duke sqaruar se vendimi për mbështetjen financiare është marrë nga kryesia e Kuvendit në përputhje me rregulloren për subvencionim.

Sipas saj, përveç përfaqësuesve të Listës Serbe, të gjithë anëtarët e tjerë të kryesisë kanë votuar në favor të këtij vendimi.

Haxhiu ka shprehur keqardhje për situatën e krijuar, duke theksuar se vendimmarrja është bazuar në informacionet e disponueshme në atë kohë dhe se nuk ka pasur indikacione për pasaktësi në përmbajtjen e ekspozitës.

Ajo ka sqaruar gjithashtu se verifikimi i të dhënave nuk është kompetencë e drejtpërdrejtë e kryesisë së Kuvendit, ndërsa ka theksuar se mbështetja është dhënë me qëllim të mirë.

Megjithatë, Haxhiu e ka cilësuar këtë rast si një moment reflektimi institucional, duke paralajmëruar hapa konkretë për përmirësimin e proceseve vendimmarrëse.

Sipas saj, do të ndërmerren masa për forcimin e mekanizmave të vlerësimit, përmes themelimit të komisioneve profesionale dhe ndryshimit të rregullores ekzistuese, me synim rritjen e transparencës dhe llogaridhënies.

/Kosovapress/