Ish-nënkryetari i Komunës së Prishtinës, tani deputet i Lidhjes Demokratike të Kosovës, Alban Zogaj ka dorëzuar sot në Gjykatën Themelore të Prishtinës, padinë për shpifje ndaj Dejona Mihalit, aktiviste e Lëvizjes Vetëvendosje.

Zogaj ka shkruar në Facebook se akuzën po e bën pas akuzave të rënda dhe të pabaza që ajo ka bërë kundër tij.

“Ndër të tjera, ajo më ka akuzuar padrejtësisht për manipulim të votave të diasporës, një shpifje e pastër që synon të dëmtojë integritetin tim dhe besimin e qytetarëve në procesin zgjedhor. Unë besoj në ndershmërinë e procesit demokratik dhe nuk do të lejoj që askush të përhapë shpifje për qëllime politike. Prandaj, përmes kësaj padie, po mbroj jo vetëm dinjitetin tim, por edhe parimin se zgjedhjet duhet të jenë të pastra dhe të drejta, të mbrojtura nga çdo tentativë për manipulim apo diskreditim përmes shpifjeve. Drejtësia duhet të thotë fjalën e saj dhe e vërteta duhet të mbizotërojë mbi shpifjet”, ka shkruar ai.