Banka Qendrore Evropiane mbajti konstante normat e interesit të politikës së saj në takimin e prillit të enjten në përputhje me pritjet e tregut. Norma e interesit për operacionet kryesore të rifinancimit, normat e interesit për kredinë marxhinale dhe atë të depozitave do të mbeten të pandryshuara përkatësisht në 4.5%, 4.75% dhe 4%, njofton banka. Duke filluar nga korriku 2022, Banka Qendrore Evropiane (ECB) rriti gradualisht normën e interesit nga 0% në 4.5% deri në shtator 2023 dhe më pas e mbajti të pandryshuar deri më tani.

Inflacioni ka vazhduar të bjerë, i udhëhequr nga inflacioni më i ulët i çmimeve të ushqimeve dhe mallrave, tha banka, duke shtuar se shumica e masave të inflacionit bazë po lehtësohen, rritja e pagave po zbutet gradualisht dhe firmat po thithin një pjesë të rritjes së kostove të punës në fitimet e tyre. "Kushtet e financimit mbeten kufizuese dhe rritja e normave të interesit në të kaluarën vazhdon të rëndojë mbi kërkesën, gjë që po ndihmon në uljen e inflacionit. Por presionet e brendshme të çmimeve janë të forta dhe po e mbajnë të lartë inflacionin e çmimeve të shërbimeve," tha ECB. Banka vlerëson se normat e saj të interesit janë në nivele që po japin një kontribut thelbësor në procesin e vazhdueshëm të dezinflacionit. /AA