Studiuesja në Fondacionin për Mbrojtjen e Demokracive, Ivana Stradner ka thënë se presidenti i Rusisë, Vladimir Putin po hap një front të ri kundër Perëndimit. Ai po vepron në Ballkanin Perëndimor, i cili është krahu më i dobët i NATO-s dhe paraqet një objektiv të përshtatshëm për ambiciet e Rusisë.
Stradner në një opinion për Telegraph.co.uk, ka komentuar edhe sulmin terroristë të 24 shtatorit në veri të vendit, duke thënë se ky përshkallëzim është një ëndërr e realizuar për Moskën.Opinioni i plotë i Ivana Stradner:
Përballë tensioneve në rritje, objektivi strategjik kryesor i Vladimir Putin është tashmë i qartë: të shpërbëjë NATO-n dhe të ekspozojë dobësitë e aleancës. Pasi Rusia po përjeton pengesa në Ukrainë, kërcënimi i menjëhershëm për anëtarët e NATO-s si Poloninë dhe shtetet baltike mund të zbutet disi. Megjithatë, është në Ballkan ku krahu më i dobët i NATO-s, i cili paraqet një objektiv të përshtatshëm për ambiciet e Rusisë.
Ky përshkallëzim është një ëndërr e realizuar për Moskën. Serbia dhe Rusia i kanë përgatitur serbët për përshkallëzime në Kosovë prej muajsh, duke ndezur tensionet në Ballkan për të hutuar Perëndimin nga lufta e tij në Ukrainë. Ata kanë vërshuar me propagandë duke përsëritur pretendimin e vjetër se Kosova i përket Serbisë – një ndër to është artikull propagandistik i cili argumentoi se Britania e Madhe po përgatit një luftë atje. Siç e di çdo student i historisë së Ballkanit, një retorikë e tillë ka ndezur më parë dhunën etnike në rajon.
Rusia shpejtoi të përfitonte nga incidenti: një zëdhënës rus deklaroi se "presioni shtesë perëndimor" po e çonte "të gjithë rajonin e Ballkanit në një prag të rrezikshëm". Putini e di se nuk ka nevojë të dërgojë forca ushtarake në Ballkan – ai mund të përdorë luftën hibride për të destabilizuar rajonin dhe për të rivendosur Rusinë si të vetmin negociator të besueshëm të konfliktit atje. Ky plan realizon tre qëllime: të shpërqendroj Perëndimin nga Ukraina, të forcojë pozitën rajonale të Moskës dhe t'i japë Putinit ndikimin e fuqive perëndimore nëse ata duan që konflikti në rajon të mos përshkallëzohet.
Të premten Shtëpia e Bardhë ndërmori hapin e paprecedentë duke njoftuar publikisht për një “dislokim të madh ushtarak serb përgjatë kufirit me Kosovën”. Sado e rrezikshme të jetë kjo, Vuçiq e di se nuk ka nevojë të dërgojë ushtri. Në vend të kësaj, ai mund të përdorë librin e lojërave të Putinit dhe të dërgojë "burra të vegjël të gjelbër” - ushtarë me uniforma të pashënuara, për të minuar Kosovën dhe për të krijuar një mohim të besueshëm. Ndoshta kjo është pikërisht ajo që ka ndodhur tashmë.
NATO ka njoftuar se është duke forcuar praninë e trupave të saj në Kosovë – me Ministrinë e Mbrojtjes të Mbretërisë së Bashkuar që transferon komandën e një batalioni të ushtrisë në NATO për të ofruar ndihmë – por ajo duhet të bëjë më shumë, dhe shpejt, për të shuar dhunën dhe për të paralajmëruar Rusinë dhe Serbinë. Më urgjentisht, ajo duhet të përshpejtojë operacionet e saj të informacionit brenda dhe jashtë vendit. Një krizë tjetër e Kosovës mund të përhapet lehtësisht në Maqedoninë e Veriut, një vend anëtar i NATO-s, dhe do të kishte implikime të mëdha për mbrojtjen evropiane në një kohë kur SHBA-ja është e hutuar nga zgjedhjet e saj të ardhshme. Ky është një moment i rrezikshëm, por pakkush është duke folur për të.
