Kryetari i Lidhjes Demokratike të Kosovës, Lumir Abdixhiku duke përmendur akuzën e Prokurorisë Speciale ndaj Nagip Krasniqit dhe hetimin ndaj Martin Berishajt, ka thënë se mafia energjetike i ka rrënjët e thella në pushtetin popullist.

Sipas tij, sikur Nagipi, ashtu dhe Martini, kishin marrë mbrojtje publike nga kryeministri Albin Kurti.

“Pas 9 shkurtit, hetimet e pavarura të një sistemi juridik pa presion popullist, do të japin dritë edhe mbi të gjithë tenderët sekret. Kemi ngritur mjaftueshëm fakte për 113 tenderët e tjerë SEKRET në KEK, e mbi 877 të tjerë në gjithë Qeverinë për tre vite - pothuajse nga një në ditë”, ka shkruar ai.

Komenti i plotë i Lumir Abdixhikut:

MË 9 SHKURT BIE MAFIA ENERGJETIKE

- Nagip Krasniqi, i caktuar nga partia në pushtet në krye të KEK-ut, akuzohet nga Prokuroria Speciale për negocimin e një TENDERI SEKRET në vlerë prej 3.4 milion eurove.

- Ky tender sekret është negociuar kur Blloku A5 qëndronte jashtë funksionit për plot 9 muaj. Në atë kohë, gjatë dimrit, Kosova blinte rrymë nga 1 MILION EURO NË DITË; secilën ditë!

- Gjithë këtë vlerë e paguanin qytetarët e Kosovës. Sepse Qeveria, nëpërmjet Rregullatorit, kishte rritur çmimet e energjisë për 100%.

- Martin Berishaj, anipse ambasador, hetohet sot për ndërmjetësimin e bërë për blerjen e energjisë. Për këtë punë ishte shpërblyer me 2 milion euro nga GEN-I me seli në Beograd. Martin Berishaj i kishte tërhequr plot 1.5 MILION EURO para të gatshme nga njëra bankë në Prishtinë.

- Sikurse Nagipi, ashtu dhe Martini, kishin marrë mbrojtje publike nga Kryeministri - që i kishte vendosur të dy; njërin në KEK, tjetrin ambasador në Kroaci.

Mafia energjetike i ka rrënjët e thella në pushtetin popullist. Prandaj dhe marrin mbrojtje publike. Prandaj dhe sulmohet Prokuroria e Media. E japin këtë mbrojtje sepse ndihen të paprekshëm. Arroganca e 51% ka krijuar këtë vetëbesim prej të fortit.

MË 9 shkurt bie Mafia Energjetike!

Pas 9 shkurtit, hetimet e pavarura të një sistemi juridik pa presion popullist, do të japin dritë edhe mbi të gjithë tenderët sekret. Kemi ngritur mjaftushëm fakte për 113 tenderët e tjerë SEKRET në KEK, e mbi 877 të tjerë në gjithë Qeverinë për tre vite - pothuajse nga një në ditë.