Lidhja Demokratike e Kosovës (LDK) është në një pozicion të vështirë dhe në prag të përçarjes, thonë analistët politikë, pas shpërfaqjes në publik të pakënaqësive të figurave kyçe të LDK-së në lidhje me dyshimet për manipulim të votave me postë. Të njëjtët deklarojnë se LDK-ja tani është e ndarë në grupacione dhe se nevojitet një rikonfirmim për lidershipin aktual të partisë, raporton KosovaPress.
Pas ish-kryeministrit Avdullah Hoti, i cili kërkoi udhëheqje të re në LDK, së fundmi dolën në pah disa biseda të brendshme të anëtarëve të Kryesisë së LDK-së, ku paraqitet ankesa për manipulime të votave me postë gjatë procesit zgjedhor të 9 shkurtit. Madje, ish-shefi i Grupit Parlamentar të LDK-së, Arben Gashi, në bazë të bisedave të brendshme të LDK-së të publikuara në media e kishte quajtur “skemë kriminale” votat me postë të LDK-së, shkruan KosovaPress.
Megjithatë, analistja politike, Magbule Shkodra, thotë për KosovaPress se për këto dyshime nëse ka fakte duhet të dorëzohet në organet kompetente nga Gashi dhe të tjerët në LDK të cilët kanë aludime të tilla.
Mirëpo, ajo thekson se nga këto pakënaqësi më së shumti do të dëmtohet LDK-ja si në pozicionin e saj të negocimit për formimin e qeverisë së re dhe po ashtu edhe në përgatitjet për zgjedhjet lokale.
Si pasojë e kësaj, Shkodra e sheh të mundshme edhe përçarjen brenda partisë, andaj e sheh të nevojshme edhe rikonfirmimin e lidershipit aktual të partisë.
Në anën tjetër, politologu, Albinot Maloku, thotë se shpërfaqja e pakënaqësive të brendshme në LDK tregon se partia është e ndarë në dy grupacione. Sipas tij, njëra palë po dëshiron të jetë pjesë e qeverisë së ardhshme dhe tjetra që nuk dëshiron të jetë pjesë e ekzekutivit të ardhshëm as me LVV-në dhe as me opozitarët.
Sipas tij, dyshimet për manipulim të votave me postë të LDK-së përveç pasojave penale do të ketë edhe politike e moral brenda strukturave të LDK-së.
Kryetari i LDK-së, Lumir Abdixhiku, publikimin e bisedave të brendshme të anëtarëve të kryesisë së partisë i ka cilësuar si sulme të sinkronizuara ndaj LDK-së, të nisura që nga përfundimi i zgjedhjeve, të cilat, sipas tij, nuk janë as të rastësishme e as të paqëllimshme.
Lëvizja Vetëvendosje ka akuzuar Lidhjen Demokratike të Kosovës për manipulim të votave me postë nga diaspora.
Madje të njëjtit kanë dorëzuar ankesë në PZAP dhe Gjykatë Supreme, duke kërkuar anulimin e votave të LDK-së dhe rivotim, mirëpo dy institucionet i rrëzuan poshtë ankesat e tyre.
Lajmi i plotë në sistemin me parapagim…
https://kosovapress.com/kriza-ne-ldk-bisedat-qe-zbuluan-akuzat-per-manipulime-dhe-reagimet-tjera
/KosovaPress/
Marketing
Lexo edhe
Video
