Ukraina është e hapur ndaj investimeve të SHBA-së në mineralet e rralla të tokës, por Kievi duhet të marrë përfitime ekonomike nga një marrëveshje dhe t’i jepen garanci sigurie, tha këshilltari i lartë i presidentit ukrainas.
Mykhailo Podolyak tha për BBC se është “i befasuar” nga komentet e fundit të presidentit Donald Trump, pasi ky i fundit dëshiron t’i jepet qasje në mineralet e Ukrainës si formë dëmshpërblimi për miliarda dollarët që SHBA ka shpenzuar për të mbështetur Kievin.
“Është pak e çuditshme, sepse ne shohim retorikën e tij agresive ndaj Evropës dhe Ukrainës dhe retorikën e tij shumë më pak të justifikuar ndaj Federatës Ruse. Ne nuk e kuptojmë ende se pse kjo administratë po i bën këto pretendime … këto pretendime janë padyshim të padrejta,” tha Podolyak.
Ai tha se Ukraina po kërkon të bashkëpunojë me SHBA-në dhe se është e përgatitur për të hapur investime në industritë globale dhe zhvillimin e fushave minerale, por gjithashtu ka nevojë për garanci sigurie.
“Nëse SHBA refuzon të mbështesë Ukrainën, do të jetë një faktor demoralizues për të gjithë Evropën dhe do të dëmtojë reputacionin e SHBA,” tha Podolyak.
Kujtojmë, Mike Waltz, një anëtar i ekipit amerikan që filloi negociatat me Moskën të martën, tha se pret që Volodymyr Zelensky të nënshkruajë një marrëveshje sipas së cilës SHBA-ja do të merr një pjesë të pasurisë nga burimet minerale të Ukrainës.
Zelensky hodhi poshtë të mërkurën kërkesat e SHBA-së, por dje ai deklaroi se Ukraina është “gati për një marrëveshje të fortë, efektive investimi dhe sigurie me presidentin e SHBA-së”.
