Klub i basketbollit Ylli ka vendosur të mos e zhvillojë ndeshjen kundër skuadrës nga Shqipëria, Besëlidhja, e vlefshme për vendin e tretë të këtij edicioni të Ligës Unike, raporton KosovaPress.
Në njoftimin zyrtar të klubit nga Suhareka thuhet se këtë vendim e kanë marrë pas takimit të bordit. Arsyeja, sipas tyre, është marrë për shkak të mbingarkesës së lojtarëve
“Sot, pas takimit të Bordit të Golden Eagle Yllit, është marrë vendimi që ekipi ynë nuk do të udhëtojë për të zhvilluar ndeshjen për vendin e tretë në Ligën Unike. Ky vendim është marrë për shkak të mbingarkesës së lojtarëve, duke pasur parasysh që luajmë ndeshjen të shtunën në kuadër të Superligës kundër Bashkimit dhe situatën me shumë lëndime gjatë këtij sezoni, veçanërisht në javët e fundit”, thuhet në njoftim.
Ndryshe, finalja e Ligës Unike do të zhvillohet sonte ndërmjet Prishtinës dhe Vëllaznimit me fillim nga ora 20:00 në Prishtinë.
