Ish-ambasadori i OSBE-së në Kosovë, William Walker është paraqitur sot para Gjykatës Themelore në Prishtinë.
Lajmin për KosovaPress e konfirmuar zëdhënësja e Gjykatës Themelore në Prishtinës, Mirlinda Gashi e cila bëri të ditur se dëshmia e Walker bëhet pas kërkesës së Prokurorisë Speciale për mundësi hetuese të veçantë për marrjen e deklaratës së tij.
“Ju njoftojmë se pas kërkesës së Prokurorisë Speciale të Republikës së Kosovës për mundësi hetuese të veçantë për marrjen e deklaratës së dëshmitarit W.W, Gjykata Themelore në Prishtinë – Departamenti Special është duke mbajtur seancën për mundësi hetuese të veçantë për marrjen e deklaratës së dëshmitarit W.W, i cili ka të bëjë me krime lufte. Rasti është i mbyllur për publikun”, thotë Gashi në një përgjigje me shkrim për KosovaPress.
Avokatët nuk kanë dashur të japin detaje, ndërkohë që mësohet se dëshmia ndërlidhet me masakrën e Reçakut.
Lajmi në përditësim.
Më 15 janar 2025, Kosova përkujtoi 26-vjetorin e masakrës së Reçakut, ku u vranë mbi 45 civilë të pafajshëm shqiptarë. Ish-shefi i misionit vëzhgues të OSBE-së në Kosovë, ambasadori William Walker, e pati cilësuar masakrën e Reçakut si krim kundër njerëzimit.
