Zëvendëskryeministri në largim i Serbisë, Aleksandar Vulin, ka akuzuar Bashkimin Evropian (BE) për përpjekje për të përmbysur entitetin boshnjak të Republikës Serbe dhe presidentin e saj Milorad Dodik.
Gjatë një vizite në Rusi më 27 shkurt, ku u takua me ideologun kryesor të Kremlinit, Alexander Dugin, Vulin deklaroi se BE-ja kishte “humbur statusin e saj si fuqi e madhe” dhe “të drejtën për të marrë pjesë në mënyrë të barabartë me fuqitë botërore – Rusinë, Kinën dhe SHBA-në – në bisedimet për të ardhmen e botës”.
“Prandaj, BE-ja po përpiqet, nëpërmjet përfaqësuesve të saj, të shkaktojë destabilitet dhe konflikt në BiH, duke tentuar të rrëzojë Milorad Dodik dhe Republikën Srpska, dhe në këtë mënyrë të përmbysë në mënyrë indirekte (presidentin serb) Aleksandar Vuçiç, sado që përfaqësuesit e BE-së betohen se kjo nuk është e vërtetë”, tha Vulin në Universitetin Ruse Human, shkruan REL.
Ai shtoi se “duke provokuar këto konflikte, BE-ja do të tregonte se ende ka ndikim dhe aftësi për të kontrolluar konfliktin”, njoftoi qeveria serbe.
Akuzat e Vulin për “përpjekjen për të përmbysur” liderët e Republikës Srpska dhe të Serbisë i referohen vendimit të Gjykatës së Bosnjës dhe Hercegovinës kundër Milorad Dodik për mosrespektim të vendimeve të Përfaqësuesit të Lartë në Bosnje dhe Hercegovinë, si dhe protestat që janë bërë në të gjithë Serbinë për më shumë se tre muaj si rrjedhojë e shembjes së strehës në Novi Sad.
