Të enjten dhe të premten në Kosovë do të qëndrojë për vizitë zyrtare presidenti i Letonisë, Edgars Rinkevics.
Policia e Kosovës njoftoi për ndërprerje të përkohshme të trafikut në disa segmente rrugore ku pritet të kalojë eskorta e tij si dhe në afërsi të objekteve shtetërore, raporton KosovaPress.
Sipas policisë, do të ketë riorientim të trafikut në rrugë alternative.
“Për të mundësuar qarkullim të lirë të eskortës sipas itinerarit të lëvizjes si dhe zhvillimin e aktiviteteve sipas agjendës së vizitës, Policia e Kosovës do të bëjë ndërprerje të përkohshme të qarkullimit të trafikut [në intervale të shkurtra kohore] të disa segmenteve rrugore [ku pritet të kalojë eskorta] dhe në afërsi të objekteve shtetërore, ku do të ketë riorientim të trafikut në rrugë alternative”, tha Policia e Kosovës në një njoftim derisa kërkoi mirëkuptim nga ana e qytetarëve dhe pjesëmarrësve në trafik.
Rinkevics do të pritet nga presidentja Vjosa Osmani në ora 13:00, raporton KosovaPress.
Pas këtij takimi, sipas njoftimit të lëshuar nga Presidenca, pritet që të mbahet edhe konferencë për media.
Lexo edhe: https://kosovapress.com/presidenti-i-letonise-sot-ne-kosove-pritet-nga-osmani
