Presidenti i SHBA-së, Donald Trump, zbuloi të martën se mori një letër nga Presidenti i Ukrainës, Volodymyr Zelensky, që shprehte gatishmërinë e Kievit për të ardhur në tryezën e bisedimeve për të arritur një “paqe të qëndrueshme”.
“Letra thotë se Ukraina është gati të vijë në tryezën e bisedimeve sa më shpejt të jetë e mundur për të afruar paqen e qëndrueshme”, tha Trump ndërsa mbante fjalimin e tij të parë të përbashkët para Kongresit që nga kthimi në detyrë. “Askush nuk do paqen më shumë se ukrainasit”.
“Ekipa ime dhe unë jemi gati të punojmë nën udhëheqjen e fortë të Presidentit Trump për të arritur një paqe që do të zgjasë”, shkruante Zelensky, sipas Trump, raporton AA.
“Ne e vlerësojmë shumë sa ka bërë Amerika për të ndihmuar Ukrainën të mbajë sovranitetin e saj”.
Trump gjithashtu theksoi gatishmërinë e Ukrainës për të nënshkruar një marrëveshje për mineralet dhe sigurinë.
“Përsa i përket marrëveshjes për mineralet dhe sigurinë, Ukraina është gati ta nënshkruajë atë në çdo kohë që është e përshtatshme për ju”, citoi Trump Zelenskyn të ketë thënë.
Presidenti po ashtu vuri në dukje se bisedimet e zhvilluara njëkohësisht me Rusinë kanë treguar shenja të gatishmërisë për bisedime për paqen.
“Në të njëjtën kohë, kemi pasur bisedime serioze me Rusinë dhe kemi marrë sinjale të forta që ata janë të gatshëm për paqe”, shtoi Trump. “A nuk do të ishte e bukur?”, përcjell KosovaPress.
Pala ukrainase nuk e konfirmoi menjëherë letrën.
Më herët gjatë ditës, Zelensky shprehu keqardhje për një takim të diskutueshëm javën e kaluar në Shtëpinë e Bardhë, duke thënë se ai nuk kishte shkuar siç ishte planifikuar.
Në X, Zelensky ribotoi gatishmërinë e Ukrainës për të filluar negociatat me Rusinë sa më shpejt të jetë e mundur për të zgjidhur konfliktin, i cili ka filluar më 24 shkurt 2022.
“Takimi ynë në Uashington, në Shtëpinë e Bardhë të premten, nuk shkoi siç duhej. Është keqardhëse që ndodhi kështu. Është koha të rregullojmë gjërat”, shkroi ai.
“Ne do të donim që bashkëpunimi dhe komunikimi në të ardhmen të jenë konstruktive”.
