Presidenti i zgjedhur i SHBA-së, Donald Trump, kundërshtoi të premten që flamujt amerikanë të valonin në gjysmë shtizë në inaugurimin e tij më 20 janar, siç është zakon për një muaj në nderim të ish-presidentit të ndjerë Jimmy Carter.
Presidenti Joe Biden urdhëroi që flamujt të valonin në gjysmë shtizë për 30 ditë pas vdekjes së Carter më 29 dhjetor.
Trump, i cili ka thënë se do të merr pjesë në shërbimin përkujtimor të Carter në Uashington më 9 janar, kishte vërejtjet e tij në një postim në rrjetin Truth Social.
“Demokratët janë të gjithë ‘të entuziazmuar’ që flamuri ynë i lavdishëm amerikan do të jetë në gjysmë shtizë gjatë inaugurimit tim. Ata mendojnë se është kaq e mrekullueshme dhe janë shumë të lumtur për këtë, sepse nuk e duan vërtet vendin tonë, ata vetëm mendojnë për veten e tyre”, tha ai.
Trump vuri në dukje se për shkak të vdekjes së Carter javën e kaluar, flamuri amerikan “do të ulet në gjysmë shtizë për herë të parë në histori gjatë inaugurimit të një presidenti të ri”.
“Askush nuk e dëshiron këtë dhe asnjë amerikan nuk mund të jetë i lumtur për këtë. Do të shohim se si do të ndodhë,” tha ai.
Zëdhënësja e Shtëpisë së Bardhë Karine Jean-Pierre tha se Shtëpia e Bardhë nuk ka ndërmend të rishqyrtojë vendimin.
