Presidenti i SHBA-së Donald Trump tha se do të vendoste tarifa dytësore prej 25 deri në 50 për qind për naftën ruse nëse Moska pengon përpjekjet për t’i dhënë fund luftës në Ukrainë.
Trump tha për NBC News se ishte “shumë i zemëruar” kur presidenti rus Vladimir Putin bëri thirrje për largimin e presidentit ukrainas Volodymyr Zelensky dhe krijimin e një qeverie kalimtare me mbështetjen e Kombeve të Bashkuara.
“Qeveria e re do të thotë se nuk do të ketë një marrëveshje për një kohë të gjatë, apo jo? Nëse jemi në mes të negociatave, atëherë mund të them se isha shumë i zemëruar, i tërbuar, kur Putin filloi të vinte në dyshim besueshmërinë e Zelensky dje… sepse thjesht nuk po çon në drejtimin e duhur, e dini?” tha Trump.
Donald Trump tha se ai planifikon të zhvillojë një bisedë telefonike me Vladimir Putin këtë javë.
“Nëse Rusia dhe unë nuk mund të arrijmë një marrëveshje për të ndaluar gjakderdhjen në Ukrainë, dhe nëse zbuloj se është faji i Rusisë, unë do të vendos tarifa dytësore për naftën, për të gjithë naftën që vjen nga Rusia. Kjo do të thotë se nëse blini naftë nga Rusia, nuk mund të bëni biznes në Shtetet e Bashkuara. Do të ketë një tarifë 25 për qind për të gjithë naftën, një tarifë prej 25 deri në 50 pikë përqindje për të gjithë naftën,” vuri në dukje ai.
Ai tha se tarifat për naftën ruse do të hynin në fuqi brenda një muaji pa një marrëveshje armëpushimi.
Trump tha se Putin e di se ai është i zemëruar me të, por theksoi se “zemërimi do të qetësohet shpejt nëse Putin bën gjënë e duhur”.
Në fillim të kësaj jave, sekretari i Shtetit Marco Rubio minimizoi perspektivat për bisedime të nivelit të lartë për t’i dhënë fund luftës, duke thënë se “ka ende shumë punë për të bërë,” raporton KosovaPress.
