Presidenti i SHBA-së, Donald Trump, ka publikuar një mesazh në rrjetin e tij social, Truth Social, ku krahasoi gjendjen e Amerikës me një pacient që ka kaluar një operacion, por që tani është në rrugë të shërimit, shkruan KosovaPress.
“Operacioni përfundoi. Pacienti mbijetoi dhe është duke u shëruar. Prognoza tregon se pacienti do të jetë dukshëm më i fuqishëm, më i madh, më i mirë dhe më i qëndrueshëm se kurrë më parë. Ta bëjmë Amerikën sërish të madhe!”, shkroi Trump.
Ky mesazh i Donald Trump erdhi pas vendimit të tij për vendosjen e tarifave të reja tregtare, duke përfshirë një tarifë minimale prej 10% për të gjitha mallrat e importuara në SHBA. Disa vende do të përballen me tarifa edhe më të larta, bazuar në atë që administrata e Trump i cilëson si praktika të padrejta tregtare ose tarifa të larta ndaj eksporteve amerikane, shkruan KosovaPress.
Ndër vendet më të prekura nga këto tarifa janë disa ekonomi në zhvillim në Azi dhe Afrikë, si Kamboxhia (49%), Laosi (48%), Vietnami (46%), Mianmari (44%) dhe Madagaskari (47%). Gjithashtu, vende të zhvilluara si Zvicra (31%), Afrika e Jugut (30%) dhe Bashkimi Evropian (20%) janë në shënjestër të këtyre masave.
Sa i përket Ballkanit, Serbia është goditur më së shumti nga këto tarifa (37%), ndërsa më së paku janë prekur Kosova dhe Shqipëria (10%).
Lexo edhe: https://kosovapress.com/tarifat-e-trump-per-rajonin-me-e-goditura-serbia
/KosovaPress/
