Gjykata Speciale konfirmoi vizitën e ish-presidentit Hashim Thaçi në Kosovë, për të shkuar të varri i babait të vet si dhe për të takuar familjen e ngushtë.
“Gjatë vizitës, i akuzuari do të vazhdojë të mbahet në paraburgim dhe nën ruajtje të Dhomave të Specializuara”, tha gjykata në një deklaratë publike të premten më 21 mars.
Gjykata tha se vizita u mundësua për “arsye humanitare bindëse”.
Nën masa të rrepta të sigurisë, Thaçi u soll nga Haga në Kosovë pesë ditë pas vdekjes së babait dhe tri ditë pas varrimit, raporton KosovaPress.
“Te varri i yt erdha i fundit, babë”, shkroi ish-presidenti Hashim Thaçi, në kurorën të cilën e la të premten mbi varrin e babait të vet në Burojë të Skenderajt.
“Para meje erdhën mijëra qytetarë. Së shpejti, dorë më dorë, do t’i falënderoj të gjithë. Të qoftë i lehtë dheu i Kosovës”, është mesazhi i ish-presidentit.
Gjykata Speciale nuk i dha leje Thaçit të marrë pjesë në varrimi ne babait të vet të martën.
Pas homazheve, Thaçi u dërgua në shtëpinë e tij ku nuk dihet se sa orë do të qëndrojë.
Ai mbërriti në fshatin e tij rreth orës 11:00 më 21 mars, me leje të Dhomave të Specializuara të Kosovës në Hagë – që njihen si Gjykata Speciale, shkruan KosovaPress.
Thaçi po përballet me një proces të tejzgjatur gjyqësor, nën akuzat për krime të pretenduara të luftës.
Ai është deklaruar i pafajshëm për të gjitha pikat e aktakuzës./KosovaPress
Lexo edhe: https://kosovapress.com/te-varri-i-yt-erdha-i-fundit-dedikimi-i-thacit-per-babain-e-vet
