Ambasadori i BE-së në Kosovë, Aivo Orav ka takuar diplomatin nga Danimarka, Peter Sorensen, i cili tanimë është konfirmuar nga ambasadorët e Bashkimit Evropia për postin e përfaqësuesit të posaçëm për dialogun mes Kosovës dhe Serbisë.
Orav ka shkruar në X, se është i bindur se përvoja e tij e gjerë diplomatike do të ndihmojë në avancimin e normalizimit të marrëdhënieve ndërmjet Serbisë dhe Kosovës.
“Ekipi im dhe unë do ta mbështesim plotësisht”, ka shkruar ai.
Politikani nga Danimarka Peter Sorensen i cili u zgjodh nga përfaqësuesja e lartë e BE-së për politikë të jashtme dhe siguri, Kaja Kallas, për ta zëvendësuar Mirosllav Lajçakun në këtë post nga sot, më 1 shkurt do ta marrë mandatin e tij. Sorensen është konfirmuar përfundimisht emisar për dialogun Kosovë-Serbi nga ministrat e Jashtëm të Bashkimit Evropian.
Deri më tani këtë post e ka ushtruar emisari Miroslav Lajçak, i cili ditë më parë gjatë qëndrimit në Davos e kishte konfirmuar se është java e fundit e tij. Lajçak po ashtu tha se dialogu është më vendimtar se kurrë në botën e sotme.
“Dialogu është më vendimtar se kurrë në botën e sotme. U takova gjithashtu me liderë nga Ballkani dhe mora pjesë në Dialogun tradicional të Diplomacisë për rajonin. Në ndërhyrjen time, theksova se BE-ja është serioze për zgjerimin e Bashkimit, por kjo nuk do të ndodhë si parazgjedhje dhe i kërkova rajonit të qëndrojë në kurs. Ndërsa filloj javën e fundit të gati pesë viteve të mia në rolin tim aktual, ditët në vijim do të fokusohen në informimet përfundimtare dhe procedurat e dorëzimit”, kishte shkruar Lajçak.
Lajçak do të pasohet nga diplomati Sorensen i cili ka përvojë të gjatë diplomatike në strukturat e BE-së.
https://kosovapress.com/admin/ëp-admin/edit.php?post_type=post
