Me rastin e 16-vjetorit të anëtarësimit të Shqipërisë në aleancën veri-atlantike NATO, presidenti Bajram Begaj dhe ministri i Mbrojtjes, Pirro Vengo theksuan se megjithë sfidat, Shqipëria mbetet e përkushtuar ndaj aleancës, të cilën e konsiderojnë si më të fuqishmen ushtarake në botë.
Presidenti Begaj në platformën X, thotë se gjatë këtyre viteve, Shqipëria ka dëshmuar të jetë një anëtare e denjë me kontribute aktive në misionet dhe operacionet e NATO-s.
“Sot aleanca më e suksesshme e mbrojtjes kolektive. Gjatë këtyre viteve, Shqipëria ka dëshmuar të jetë një anëtare e denjë me kontribute aktive në misionet dhe operacionet e NATO-s. Ne mbetemi të përkushtuar ndaj aleancës euroatlantike, duke siguruar një NATO të fortë, të bashkuar dhe kohezive”, shkruan Begaj.
Ndërkaq, ministri i Mbrojtjes së Shqipërisë, Pirro Vengu shkruan se këto 16 vjet anëtarësimi në NATO ishin një rrugëtim i mbushur me sfida, përkushtim dhe arritje të mëdha për Shqipërinë, raporton KosovaPress.
“16 vite më parë, Shqipëria iu bashkua Aleancës më të fuqishme ushtarake në botë! Rrugëtim i mbushur me sfida, përkushtim dhe arritje të mëdha. Sot, Forcat tona të Armatosura kontribuojnë në misione të sigurisë dhe stabilitetit krah për krah aleatëve tanë, duke dëshmuar vendosmërinë e Shqipërisë për një mbrojtje kolektive dhe paqe të qëndrueshme. Krenarë për rolin tonë në Aleancë!”, thotë Vengu.
Më 1 prill 2009, Shqipëria u bë anëtare me të drejta të plota në Organizatën e Traktatit të Atlantikut të Veriut – NATO, pas përfundimit të ratifikimit të Protokollit të Anëtarësimit nga të gjitha vendet aleate dhe depozitimit të instrumentit të aderimit në NATO në Departamentin e Shtetit që është edhe mbajtësi ligjor i Traktatit të Uashingtonit.
/KosovaPress/
