Sipas të dhënave të institucioneve të sigurisë, aparati shtetëror i Serbisë po intensifikon përpjekjet për ndërhyrje në procesin zgjedhor në Kosovë, duke përdorur teknologjitë më të avancuara të inteligjencës artificiale (AI).
Burime të KosovaPress-it konfirmojnë se shërbimet serbe të inteligjencës po planifikojnë të komprometojnë rivalët politikë të Listës Serbe përmes manipulimeve të sofistikuara teknologjike.
KosovaPress mëson se në qendër të këtyre përpjekjeve janë liderët e partive rivale të Listës Serbe, përfshirë Branimir Stojanovic, Nenad Rasic, Aleksandar Arsenijevic dhe Radojica Radomirovic. Burimi tregon se këto ndërhyrje përfshijnë keqpërdorimin e imazheve dhe modifikimin e përmbajtjeve vizuale për të shtrembëruar realitetin dhe për të ndikuar opinionin.
Dihet se Serbia ka një bashkëpunim të ngushtë me Kinën, e cila njihet për hovin e saj në fushën e inteligjencës artificiale, ndërsa është kritikuar për blerjen e kamerave kineze, të cilat janë të pajisura me sisteme të sofistikuara të njohjes së njerëzve përmes fotografisë.
Para tri vitesh, Serbia, përmes institucioneve paralele në Kosovë pati blerë sistemin e video-mbikëqyrjes së kompanisë kineze që është nën sanksionet e Shteteve të Bashkuara të Amerikës (SHBA), të dedikuara për shkollat me nxënës të komunitetit serbë.
