Prokuroria Themelore në Gjakovë, në lidhje me ngjarjen tragjike që ka ndodhur në fshatin Jabllanicë të Komunës së Gjakovës, ka thënë se dje në mesnatë nga Policia e Kosovës, janë njoftuar se është shembur një objekt i pabanuar, duke rezultuar me humbjen e jetës së tre personave të mitur, të cilët fatkeqësisht ndodheshin brenda tij në momentin e shembjes.
Sipas Prokurorisë, në vendin e ngjarjes kanë dalë kryeprokurori, prokurori kujdestar, të gjitha njësit përkatëse të Policisë së Kosovës, si dhe ekipi mjekësor që ka konfirmuar vdekjen e fëmijëve.
“Me vendim të Prokurorit të Shtetit, trupat e pajetë janë dërguar për obduksion në Institutin e Mjekësisë Ligjore (IML), si dhe është iniciuar rast “Shkaktimi i rrezikut të përgjithshëm”. Prokurori i Shtetit, në koordinim të ngushtë me Policinë e Kosovës, po ndërmerr të gjitha veprimet e nevojshme për zbardhjen e këtij rasti”, thuhet në njoftim.
