Kam arritur, shkroi Milorad Dodik në rrjetin X mbrëmë, tre orë pas mesnate. Megjithatë, presidenti i Republikës Serbe, për të cilin është lëshuar një urdhër arresti, nuk ka treguar se ku ndodhet.
Burime të afërta me Dodik thanë për Istragu.ba, se presidenti i Republikës Serbe ka udhëtuar nga Beogradi në Moskë pasi ai u ndoq nga Jerusalemi, ku kishte shkuar për një konferencë antisemitizmi. Autoritetet e Izraelit kërkuan nga Dodik të largohej pasi ai kërkohet nga gjykata e BeH pas dënimit me një vit burg.
Meqenëse avioni qeveritar i Republikës Serbe është ende i “parkuar” në Banja Llukë, duket qartë se Dodik ka përdorur një tjetër avion drejt Moskës. Në ora tre ai njoftoi se kishte “arritur”. Sipas të dhënave nga aeroporti i Moskës, një aeroplan nga Beogradi u ul në orën 4:10 me kohë lokale.
Duke qenë se diferenca kohore midis BeH dhe Rusisë është dy orë, ora 4:10 e mëngjesit me orën e Moskës ishte 2:10 e mëngjesit me kohën e BeH. Dodik njoftoi se kishte “arritur” saktësisht në orën tre, domethënë rreth 50 minuta pasi avioni nga Beogradi për në Moskë u ul.
Pse Dodik udhëtoi për në Moskë me fluturim të rregullt?
Tri ditë më parë, Gjykata e BeH urdhëroi lëshimin e një urdhër-arresti ndërkombëtar për Dodik. Në momentin e publikimit, Sekretari i Përgjithshëm i Interpolit ende nuk e kishte miratuar lëshimin e fletarrestit dhe vendimi përfundimtar duhet të merret në ditët në vijim.
Nëse Interpoli lëshon një urdhër-arrest ndërkombëtar, ka një probabilitet të lartë që avioni i qeverisë së Republika Serbe që mbante Dodik, të pengohet të fluturojë mbi vendet anëtare të NATO-s. Në atë rast, avioni do të mbetej i “i bllokuar” në Moskë. Kjo është arsyeja pse Dodik vendosi të udhëtojë me fluturim të rregullt.
Listën e pasagjerëve e dinë vetëm Rusia dhe Serbia, përkatësisht shtetet prej nga ngrihet dhe ulet avioni. Udhëtimi me një fluturim të rregullt pothuajse i garanton Dodik një kthim në Beograd, edhe nëse Interpoli miraton më pas një urdhër arresti.
Autoritetet serbe nuk do ta arrestojnë Dodik me urdhërarresti nga BeH dhe ai, siç është treguar tashmë, e kalon kufirin midis BeH dhe Serbisë pa asnjë problem. Për kujtesë, Zyra e Prokurorit të BeH po kryen hetime kundër Dodik, për veprën penale sulm i rendit kushtetues. Ajo lëshoi një urdhër për arrestimin e tij, por asnjë agjenci policore në BeH nuk lejohet ta ekzekutojë atë.
Pas kësaj, për Dodik u shpall një kërkim qendror, i cili vlen vetëm brenda BeH. Ndërkohë, Gjykata e BeH urdhëroi lëshimin e një urdhër-arresti ndërkombëtar, por vendimi përfundimtar do të merret nga Sekretari i Përgjithshëm i Interpolit.
Pavarësisht se ai kërkohet brenda BeH-së, Dodik së fundmi udhëtoi në Izrael, ku mori pjesë në një konferencë mbi antisemitizmin. Ai u kthye nga Izraeli të premten në mëngjes. Sipas burimeve të Istraga, Dodik ka premtuar se të martën do të takohet me Putin. Takimi organizohet nga Dushko Peroviq, kreu i Zyrës së Përfaqësimit të Republikës Serbe në Rusi, transmeton KosovaPress.
