Papa Françesku ka pasur një natë të mirë dhe vazhdon të pushojë, sipas Zyrës së Shtypit të Selisë së Shenjtë të shtunën në mëngjes.
Zyra e Shtypit e Selisë së Shenjtë lëshoi një deklaratë të shkurtër të shtunën në mëngjes në lidhje me shëndetin e Papës.
“Nata kaloi e qetë; Papa po pushon”, thuhet në deklaratë. Gjatë mëngjesit, Papa rifilloi terapitë e përshkruara, përfshirë fizioterapinë motorike, shkruan Vatican News, transmeton KosovaPress.
Të dielën, kardinali Michael Czerny, Prefekt i Dikasterit për Promovimin e Zhvillimit Integral Njerëzor, do të lexojë predikimin e Papës të përgatitur për meshën në Sheshin e Shën Pjetrit për Jubileun e Botës së Vullnetarizmit. Teksti i Angelus-it të mesditës pritet të publikohet si të dielave të kaluara.
Gjendja klinike e Atit të Shenjtë ka mbetur e qëndrueshme gjatë ditëve të fundit teksa ai po trajtohet për pneumoni dypalëshe në spitalin Gemelli të Romës.
Të premten në mbrëmje, zyra e shtypit tha se Papa e kaloi ditën duke alternuar lutjen, pushimin dhe punën, ndërsa fizioterapia e tij e frymëmarrjes vazhdon.
“Gjatë ditës, Papa përdor kanulat e hundës për oksigjenim me rrjedhje të lartë, ndërsa natën përdor ventilim mekanik jo-invaziv”, vuri në dukje ai, duke shtuar se “prognoza e tij mbetet e ruajtur”.
Po ashtu, një përditësim më i detajuar mjekësor pritet të dalë të shtunën në mbrëmje.
